Azerconnect Group “Telekommunikasiya sektorunda kibertəhlükəsizlik” mövzusunda tədbirdə iştirak edib
Ölkənin aparıcı İKT şirkəti Azerconnect Group, Azərbaycan Kibertəhlükəsizlik Təşkilatları Assosiasiyası (AKTA) tərəfindən təşkil olunan “Telekommunikasiya sektorunda kibertəhlükəsizlik” mövzusuna həsr edilmiş dəyirmi masada iştirak edib.
Biznes TV “Azerconnect Group”a istinadən xəbər verir ki, tədbirdə dövlət qurumlarının, telekommunikasiya provayderi və operatorlarının, eləcə də digər özəl təşkilatların aidiyyəti sahə üzrə rəhbər şəxsləri və mütəxəssisləri bir araya gəlib. Görüş zamanı telekommunikasiya sahəsində kibertəhlükəsizlik çağırışları, beynəlxalq təcrübə və mövcud kibertəhdidlərə qarşı mübarizə üsulları müzakirə edilib.
İştirakçılar qeyd ediblər ki, süni intellekt və yeni texnologiyalar kibertəhlükələrin real vaxt rejimində aşkarlanması, mürəkkəb kiberhücumların qarşısının alınması, böyük həcmli məlumatların təhlili və insidentlərə cavab proseslərinin avtomatlaşdırılması sahəsində yeni imkanlar yaradır. Həmçinin maarifləndirmə tədbirlərinin gücləndirilməsi, ixtisaslı kadrların hazırlanması və dövlət-özəl tərəfdaşlığının artırılmasının kibertəhlükəsizliyin təmin edilməsində mühüm rol oynadığı vurğulanıb.
Azerconnect Group, ölkəmizin sürətlə inkişaf edən İKT və yüksək texnologiyalar sahəsində fəaliyyət göstərən aparıcı şirkətlərindən biridir. Şirkət mobil, internet, beynəlxalq kanalların təşkili, FinTech, AdTech və Media/TV kimi rəqəmsal xidmətlər təqdim edir. Azerconnect Group, müxtəlif ölkələrdə enerji, telekommunikasiya, yüksək texnologiyalar və tikinti sahələrində fəaliyyət göstərən NEQSOL Holding beynəlxalq şirkətlər qrupunun tərkibinə daxildir.
