Çinin Chery Şirkəti Samsunda Zavod Quracaq
Biznes TV Türkiyə mətbuatına istinadən xəbər verir ki, Çinin Chery şirkəti Türkiyənin Samsun şəhərində 1,5-2 milyard dollar civarında sərmayə ilə avtomobil zavodu inşa edəcək. Zavodun 1 milyon 500 min kvadratmetr sahədə qurulması və birinci mərhələdə 25 min nəfərin işlə təmin olunması planlaşdırılır.
Elektrik və hibrid avtomobil istehsalını hədəfləyən Chery-nin ildə 150 minə yaxın nəqliyyat vasitəsi istehsal edəcəyi gözlənilir. Türkiyə Prezidenti Rəcəb Tayyib Ərdoğan Nazirlər Kabinetinin iclasından sonra verdiyi açıqlamada, Çin markası BYD-nin Manisada 1 milyard dollarlıq zavod quracağını xatırladaraq, “Başqa bir Çin şirkəti də Samsuna sərmayə yatırır. Hazırlıq tamamlanıb, tezliklə zavodun təməlinin qoyulduğunu görəcəyik”, – deyib.
SUV seqmentində iddialı modelləri ilə tanınan Chery Türkiyədə ən çox satılan avtomobillər arasında yer alır. Xüsusilə Tiggo 8 Pro, Tiggo 7 Pro, Tiggo 4 Pro və Omoda modelləri böyük maraq görür.
Elektrik və hibrid texnologiyasında sərfəli qiymətlər təklif edən Çin markalarının Türkiyədə istehsala başlaması ilə avtomobil qiymətlərinin aşağı düşəcəyi gözlənilir. Yerli istehsalın əlavə gömrük rüsumlarından azad olması bu prosesə müsbət təsir edəcək.
Türkiyənin Sənaye və Texnologiya naziri Fatih Kaçır bu ayın ortalarında Samsuna investisiya üçün Chery ilə danışıqların son mərhələdə olduğunu bildirmişdi.
