HƏR SAKİNƏ 1 MİLYON DOLLAR VƏD EDİLİR
TRAMP ADMİNİSTRASİYASINDAN QRENLANDİYA PLANI
Donald Tramp administrasiyası Qrenlandiyanın ABŞ-yə birləşməsi lehinə səsvermə keçiriləcəyi təqdirdə adanın hər bir sakininə 1 milyon dollar ödənilməsini təklif etməyi nəzərdən keçirir. Bu barədə Daily Mail mənbələrə istinadən yazır. Məlumata görə, Qrenlandiyada təxminən 57 min nəfər yaşayır və bu plan ABŞ büdcəsinə 57 milyard dollara başa gələ bilər. Nəşr qeyd edir ki, ideya regionda ABŞ-nin hərbi mövcudluğunu gücləndirmək üçün alternativ mexanizm kimi müzakirə olunur. Bununla yanaşı, Danimarka mövqeyini dəyişmir. Kopenhagen Qrenlandiyanın verilməsi və ya satılması ehtimalını qəti şəkildə rədd edir və adanın statusu ilə bağlı istənilən qərarın Danimarkanın razılığı ilə mümkün olduğunu bildirir. “Bu baş verməyəcək. ABŞ Qrenlandiyaya sahib olmayacaq. Bu, qırmızı xətdir”, — deyə Danimarkanın xarici işlər naziri Lars Lokke Rasmussen DR telekanalına müsahibəsində vurğulayıb.
