19 MİLYARD GƏLİR, 2 MİLYARDDAN ÇOX PROFİSİT BÜDCƏDƏN PUL ƏN ÇOX HARA XƏRCLƏNİB?
2026-cı ilin ilk yarısında dövlət büdcəsində 2,4 milyard manat profisit yaranıb. Maliyyə Nazirliyinin açıqladığı məlumata görə, yanvar–iyun aylarında dövlət büdcəsinin gəlirləri 19 milyard 179,2 milyon manat, xərcləri isə 16 milyard 775,5 milyon manat olub. Nəticədə büdcədə 2 milyard 403,7 milyon manat həcmində artıqlıq və ya profisit qeydə alınıb.İlk altı ay ərzində dövlət büdcəsinin gəlirləri proqnozu 350,3 milyon manat və ya 1,9 faiz üstələyib. Dövlət Neft Fondundan transfert çıxıldıqda isə büdcə gəlirləri 12 milyard 759,2 milyon manat təşkil edib ki, bu da proqnozdan 2,8 faiz çoxdur.
Büdcə gəlirlərinin əsas hissəsi vergi daxilolmaları hesabına formalaşıb. Vergi orqanları vasitəsilə 8 milyard 842,7 milyon manat, Dövlət Neft Fondundan 6 milyard 420 milyon manat transfert, gömrük orqanları vasitəsilə isə 3 milyard 143,6 milyon manat büdcəyə daxil olub.
Qeyri-neft-qaz sektorundan daxilolmalar artmaqda davam edib. Bu sahədən büdcəyə 10 milyard 981 milyon manat vəsait daxil olub ki, bu da ötən ilin eyni dövrü ilə müqayisədə 6,8 faiz çoxdur. Qeyri-neft-qaz gəlirləri ümumi büdcə gəlirlərinin 57,3 faizini təşkil edib.İlk altı ayda dövlət büdcəsinin xərcləri 16 milyard 775,5 milyon manat olub. Bunun 11 milyard 642,5 milyon manatı cari xərclərə, 4 milyard 188,2 milyon manatı əsaslı xərclərə, 944,8 milyon manatı isə dövlət borcuna xidmət üçün sərf edilib.
Sosialyönlü xərclər büdcə xərclərinin yarıdan çoxunu təşkil edib. Bu istiqamətə 8 milyard 787,1 milyon manat yönəldilib ki, bu da ötən ilin eyni dövrü ilə müqayisədə 12,1 faiz çoxdur. Bu vəsait əməkhaqları, pensiyalar, sosial müavinətlər, dərman təminatı və icbari tibbi sığorta kimi sahələri əhatə edib.Funksional bölgüyə əsasən, ən çox vəsait müdafiə və milli təhlükəsizlik sahəsinə ayrılıb – 3 milyard 437,4 milyon manat. İqtisadi fəaliyyətə 2 milyard 578 milyon manat, təhsilə 2 milyard 400,1 milyon manat, sosial müdafiə və sosial təminata 2 milyard 359,8 milyon manat, ümumi dövlət xidmətlərinə isə 2 milyard 339,5 milyon manat xərclənib.İşğaldan azad olunan ərazilərin bərpasına gəlincə hesabat dövründə 1 milyard 64,1 milyon manat vəsait sərf olunub.
