Azərbaycanda notariat xidmətləri “myGov” platformasına inteqrasiya edildi
Azərbaycan Respublikasında vətəndaşların notariat xidmətlərindən istifadəsini daha da asanlaşdırmaq məqsədilə bir neçə notariat xidməti “myGov” rəqəmsal hökumət platformasına inteqrasiya edilib. Bu barədə İnnovasiya və Rəqəmsal İnkişaf Agentliyindən (İRİA) məlumat verilib.
Bu yenilik sayəsində vətəndaşlar artıq notariat kontorlarına getmədən, tam rəqəmsal qaydada etibarnamə xidmətlərindən istifadə edə bilərlər. “myGov” platforması üzərindən vətəndaşlara təqdim olunan notariat xidmətlərinə aşağıdakılar daxildir:
- Nəqliyyatdan istifadə etibarnaməsi – Şəxsin nəqliyyat vasitəsindən istifadə və idarəetmə hüququnu başqa bir şəxsə ötürməsi.
- Nəqliyyata sərəncam etibarnaməsi – Avtomobilin satılması, bağışlanması, ipotekaya qoyulması və digər sərəncam səlahiyyətlərinin rəqəmsal qaydada verilməsi.
- Qurumlarda təmsilçilik etibarnaməsi – Müxtəlif dövlət və özəl qurumlarda vətəndaşın başqa bir şəxs tərəfindən təmsil olunmasına imkan yaradan etibarnamələrin rəqəmsal qaydada verilməsi.
- Etibarnamələrin ləğvi – Daha əvvəl verilmiş etibarnamələrin təhlükəsiz və operativ şəkildə ləğv edilməsi.
Xidmətlərdən istifadə qaydası:
İstifadəçilər “myGov” platformasına daxil olaraq, müvafiq etibarnaməni rəqəmsal şəkildə tərtib edib, video təsdiqləmə vasitəsilə prosesə hüquqi qüvvə qazandıra bilərlər. Proses avtomobil və ya təmsilçilik məlumatlarının daxil edilməsini, əlaqə məlumatlarının təqdim edilməsini, video təsdiqləməni və ödənişin edilməsini əhatə edir.
Bu addım vətəndaşlara vaxt itkisini minimuma endirməklə yanaşı, etibarnamə proseslərini daha çevik, təhlükəsiz və şəffaf şəkildə həyata keçirməyə imkan verir.
