TRANZİT YÜKLƏRİN HƏCMİ SON YEDDİ İLDƏ TƏXMİNƏN ÜÇ DƏFƏ ARTIB
ŞİMAL-CƏNUB DƏHLİZİNİN YÜKDAŞIMA GÜCÜ 15 MİLYON TONA ÇATDIRILACAQ
Azərbaycan ərazisindən tranzit yüklərin həcmi son yeddi ildə təxminən üç dəfə artıb və 2025-ci ilin sonuna qədər bu rəqəm 14 milyon tonu keçəcək. Trendin məlumatına görə, bu barədə Baş nazirin müavini Şahin Mustafayev “Rusiya — İslam dünyası” KazanForum-2026 Beynəlxalq İqtisadi Forumunda bildirib.Şahin Mustafayev bildirib ki,Azərbaycan Şimal-Cənub Beynəlxalq Nəqliyyat Dəhlizini aktiv şəkildə yeniləyir və inkişaf etdirir. Bu dəhliz geosiyasi gərginliklərə baxmayaraq etibarlı və rəqabətqabiliyyətli marşrut kimi fəaliyyət göstərir.Onun sözlərinə görə Rusiya ilə razılaşmalar çərçivəsində dəmir yolu infrastrukturu genişləndirilir. Layihələrin 2028-ci ildə tamamlanması planlaşdırılır.
Bu yenilənmələr nəticəsində yükdaşıma gücü əvvəlcə 5 milyon tona, daha sonra isə illik 15 milyon tona çatacaq.
Baş nazirin müavini həmçinin vurğulayıb ki, xüsusilə Astara terminalının inkişafı və Rəşt-Astara dəmir yolu hissəsinin tikintisi vacibdir. Bu layihələr Azərbaycanın İran üzərindən Fars körfəzinə çıxışını gücləndirəcək və dəhlizin rəqabət qabiliyyətini artıracaq.
