TİBBİ TƏYİNATLI PLASTİK QABLAŞDIRMA MƏHSULLARI ZAVODU YARADILACAQ
TİBBİ TƏYİNATLI PLASTİK QABLAŞDIRMA MƏHSULLARI ZAVODU YARADILACAQ
YENİ ŞİRKƏTƏ 8 MİLYON MANAT İNVESTİSİYA QOYULACAQ
Ölkədə sayca üçüncü “Healthtech Solutions KOB Klaster Şirkəti” MMC yaradılıb. “Bakı KOB evi”ndə Kiçik və Orta Biznesin İnkişafı Agentliyi ilə şirkət arasında keçirilən görüşdə şirkətə vergi güzəştlərini nəzərdə tutan KOB klaster şəhadətnaməsi təqdim olunub.Bakıda fəaliyyət göstərəcək müəssisə laboratoriyalarda istifadə olunan test kitləri və tibbi təyinatlı plastik qablaşdırma məhsulları istehsal edəcək. Layihəyə ilkin mərhələdə 5 milyon, ümumilikdə isə 8 milyon manat investisiya yatırılması nəzərdə tutulur. Müəssisədə əvvəlcə 10, sonrakı mərhələdə isə 50 nəfərin daimi işlə təmin olunması planlaşdırılır.Hazırda 11 KOB subyekti şirkətin iştirakçısıdır. Onlar KOB klaster şirkətinə xammal tədarükü, logistika, avadanlıqların təmiri, tikinti-quraşdırma, İT və digər xidmətləri göstərəcəklər.Qanunvericiliyə əsasən, KOB klaster şirkəti və onun iştirakçıları reyestrə daxil edildiyi tarixdən etibarən 7 il müddətinə mənfəət, torpaq və əmlak vergilərindən, habelə texnoloji avadanlıqların idxalı zamanı ƏDV-dən azad olunmaqla geniş dövlət dəstəyi və vergi güzəştlərindən yararlanacaqlar.Müəssisənin fəaliyyəti laboratoriya və tibbi sərf materialları üzrə yerli istehsalın inkişafına, bu sahədə idxalın əvəzlənməsinə və ixrac potensialının artırılmasına xidmət edəcək.Qeyd edək ki, “KOB klaster şirkəti” və “KOB klaster iştirakçısı” şəhadətnamələrini verən səlahiyyətli qurum KOBİA-dır. İndiyədək Agentlik tərəfindən iki şirkətə KOB klaster şəhadətnaməsi verilib.
