FAİZSİZ BANKÇILIQLA BAĞLI YENİ AÇIQLAMA
BOKT-LAR YALNIZ ÜÇ İSLAM MALİYYƏSİ MƏHSULU TƏQDİM EDƏCƏK
Azərbaycan Mərkəzi Bankı ölkədə islam bankçılığı sisteminin tətbiqi ilə bağlı hazırlıq işlərini davam etdirir. Mərkəzi Bankın baş direktoru Şahin Mahmudzadənin sözlərinə görə, bunun üçün bir sıra qanunlara dəyişiklik layihələri hazırlanaraq aidiyyəti dövlət qurumlarına təqdim olunub.
İlk mərhələdə sistem “islam pəncərəsi” modeli ilə fəaliyyət göstərəcək. Bu modelə əsasən, mövcud banklar ənənəvi bank xidmətləri ilə yanaşı, islam maliyyəsi prinsiplərinə uyğun məhsullar da təqdim edə biləcəklər.Banklar bir neçə islam maliyyə məhsullarını təqdim edəcəklər.
İstisna – istehsal və ya tikinti layihələrinin maliyyələşdirilməsi üçün sifariş əsaslı müqavilə;
Murabaha – bankın malı alıb müştəriyə razılaşdırılmış mənfəətlə satdığı alqı-satqı maliyyələşməsi;
İjara – maliyyə lizinqinə bənzər icarə əsaslı maliyyələşdirmə;
Mudaraba – bank və müştərinin mənfəət və zərəri bölüşdüyü investisiya modeli;
Vadiə – tələbli depozitə bənzər əmanət məhsulu.
Bank olmayan kredit təşkilatları bunlardan yalnız üç məhsul təqdim edə biləcəklər.İstisna,Murabaha və İjara.Mərkəzi Bankın nəzarəti altında iki bank artıq islam maliyyə məhsullarını sınaqdan keçirir.
Azərbaycan Beynəlxalq Bankı daşınar və daşınmaz əmlakın maliyyələşdirilməsi üçün Murabaha məhsulunu test edir.
Rabitəbank isə həm Murabaha, həm də Mudaraba məhsullarını sınaqdan keçirir.
Sınaq mərhələsinin 2 fevral 2027-ci il tarixinədək davam etməsi planlaşdırılır.Mərkəzi Bank bildirir ki, məqsəd beynəlxalq islam maliyyəsi standartlarını Azərbaycan qanunvericiliyinə uyğun şəkildə tətbiq etmək və ölkədə bu sahənin inkişafını təmin etməkdir.
