İŞÇİLƏRİN DİQQƏTİNƏ BİRDƏFƏLİK SIĞORTA ÖDƏNİŞİNƏ LİMİT TƏTBİQ EDİLƏCƏK

Prezident İlham Əliyev “İstehsalatda bədbəxt hadisələr və peşə xəstəlikləri nəticəsində peşə əmək qabiliyyətinin itirilməsi hallarından icbari sığorta haqqında” qanuna dəyişiklikləri təsdiqləyib.Yeni dəyişikliklərə əsasən, birdəfəlik sığorta ödənişinin verilməsi nəzərdə tutulan hallarda hesablanan ödənişin məbləği sığorta hadisəsinin baş verdiyi tarixdə ölkə üzrə müəyyən edilən minimum aylıq əməkhaqqının min mislindən artıq ola bilməyəcək.
Qanuna edilən digər dəyişikliklərə görə, büdcə və ya müqavilə ili ərzində sığorta olunanların sayında, kateqoriyalarında, peşə riski dərəcəsində və ya əməkhaqqı fondunda dəyişiklik baş verərsə, sığorta haqqı həmin dəyişikliklərin qüvvəyə mindiyi tarixdən ilin sonunadək qalan müddət üçün yenidən hesablanacaq.
Bundan başqa, büdcə ili ərzində yeni sığortalı yarandıqda və ya sığorta haqqının yenidən hesablanmasını tələb edən hallar baş verdikdə, hesablanan sığorta haqları həmin halın yarandığı tarixdən etibarən 15 iş günü ərzində ödənilməlidir.Dəyişikliklərə əsasən, sığorta vəsaitləri son 24 ay ərzində gecikdirilmiş gəlir faizi ödənişi olmayan banklarda depozitə yerləşdirilməsindən əldə olunan gəlirlər hesabına da formalaşacaq.Qanun dövlət orqanlarında, bələdiyyələrdə, dövlət və bələdiyyə müəssisələrində, publik hüquqi şəxslərdə və büdcə təşkilatlarında çalışan işçilərə, istehsalat təcrübəsi keçən tələbə və şagirdlərə, eləcə də könüllülərə tətbiq edilir.