İŞƏGÖTÜRƏNİ HANSI HALDA 3 MİN MANATLIQ CƏRİMƏ GÖZLƏYİR?
AZƏRBAYCANDA YENİ CƏRİMƏLƏR MÜƏYYƏNLƏŞDİ
İnzibati Xətalar Məcəlləsinə dəyişiklik edilib.Yeni dəyişikliklərə əsasən, bir sıra sahələrdə cərimələr müəyyənləşdirilib və bəzi inzibati məsuliyyət tədbirləri yenilənib.Belə ki, tibbi müayinə rəyinə əsasən narkoloji xəstə olan şəxsin qanunvericiliklə fəaliyyət məhdudiyyəti nəzərdə tutulan peşə və vəzifələrə işə qəbul edilməsinə və ya həmin şəxslə əmək münasibətlərinin davam etdirilməsinə görə vəzifəli şəxslər 3 000 manat məbləğində cərimə ediləcəklər.Bundan başqa, qanunvericilikdə tələb olunduğu halda işçinin sağlamlığı barədə tibbi arayış və ya tibbi müayinə rəyi olmadan işə qəbul edilməsinə görə vəzifəli şəxslər 1 000 manat cərimələnəcəklər.Eyni zamanda, maliyyə icarəsi fəaliyyəti ilə məşğul olan şəxslər tərəfindən hesabatların qanunvericiliyə uyğun şəkildə Mərkəzi Banka təqdim edilməməsinə və ya düzgün təqdim olunmamasına görə vəzifəli şəxslər 1 000–1 500 manat, hüquqi şəxslər isə 3 000–5 000 manat məbləğində cərimə ediləcəklər.Qanuna əsasən, fermerlər və tədarükçülər ərzaq balansının hazırlanması üçün kənd təsərrüfatı məhsullarının istehsalı, istixanalar, soyuducu anbarlar və taxıl elevatorları barədə tələb olunan məlumatları müəyyən edilən müddətdə informasiya sisteminə daxil etmədikdə də məsuliyyət daşıyacaqlar. Bu halda fiziki şəxslər 100 manat, vəzifəli şəxslər 200 manat, hüquqi şəxslər isə 500 manat cərimə ediləcəklər.
Həmçinin ərzaq məhsullarının istehsalı, emalı, saxlanılması, idxalı, ixracı və satışı ilə məşğul olan subyektlər yazılı sorğu əsasında tələb olunan məlumatları 15 iş günü ərzində təqdim etmədikdə vəzifəli şəxslər 200 manat, hüquqi şəxslər isə 500 manat məbləğində cərimələnəcəklər.Yeni dəyişikliklərə əsasən, inzibati xəta bir il ərzində təkrar törədilərsə, fiziki şəxslər 200 manat, vəzifəli şəxslər 400 manat, hüquqi şəxslər isə 1 000 manat cərimə ediləcəklər.
Bununla yanaşı, qanunda inzibati məsuliyyətdən azadolma mexanizmi də nəzərdə tutulub. Belə ki, inzibati xəta törədən şəxs pozuntuya səbəb olan halları 10 iş günü ərzində aradan qaldırarsa, inzibati məsuliyyətdən azad olunacaq. Eyni müddət ərzində həmin şəxs eyni əmələ görə təkrar inzibati məsuliyyətə də cəlb edilməyəcək.
