“SPACE TV”NİN BANK HESABLARINA HƏBS QOYULDU İŞÇİLƏRİN MAAŞLARI NECƏ ÖDƏNİLƏCƏK?
“Space TV” Müstəqil Televiziya və Radio Şirkətinin bank hesabları üzərinə 140 313,06 ABŞ dolları həcmində həbs qoyulub. “Qaynarinfo” xəbər verir ki, Bakı Kommersiya Məhkəməsi “Xalq Bank” ASC-nin müvəqqəti təminat tədbirinin tətbiqi ilə bağlı ərizəsini qismən təmin edib.
İş materiallarına əsasən, 2021-ci ildə “Space TV”yə “Xalq Bank” tərəfindən illik 5 faizlə 60 ay müddətinə 235 min ABŞ dolları məbləğində kredit xətti açılıb.
Bankdan bildirilib ki, şirkətin kredit öhdəliklərini vaxtında yerinə yetirməməsi nəticəsində ümumilikdə 140 min dollardan çox borcu yaranıb.“Xalq Bank” gələcəkdə qəbul oluna biləcək məhkəmə qərarının icrasını təmin etmək məqsədilə “Space TV”nin bank hesabları üzərinə həbs qoyulmasını istəyib.Məhkəmə gələcək qərarın icrasını təmin etmək məqsədilə “Space TV”nin “Xalq Bank” istisna olmaqla, Azərbaycanda fəaliyyət göstərən digər banklardakı hesablarına həmin məbləğdə həbs qoyulmasına qərar verib.Qərarda qeyd olunub ki, bu həbs işçilərin əməkhaqlarının, vergilərin və digər məcburi dövlət ödənişlərinin həyata keçirilməsinə mane olmayacaq.
